أصعب شعور هو [الحرمآن] ..

ت

تعآبير ~

New member
إنضم
2010/01/20
المشاركات
1

السلآم عليكم ورحمة الله وبركاته ..
ادري بـ أغثكم بـ خرابيطي ..
بس وش اسوي مو بيدي والله غصب عني جايه اشكي لكم
ولا انا ماودي اضيق خاطر احد ..​

ببدأ /

مليت من الحرمان اللي عايشه فيه والله تعبت من عدم تفهم اهلي لمشاعري ومعاملتي كطفله بالامور اللي يبونها ومعاملتي كامراه كبيره بالامور اللي يبونها انا عندي احلام مثل اي بنت عمرها 16 سنه انا ابي وابي وابي بس ماصار كل اللي ابيه وانا متقبله هالشي بس مو لدرجة الحرمان الصعب والله شي يعور القلب ..
اختي متخلفه والله متخلفه
تخيلو , صار لها 6 شهور ماتسولف معي ابدن والله ابدن ابدن بالمررره ولا حتى السلام عليكم
تدرون وش السبب ؟؟
ادري اني غلطانه بس لهالدرجه انها مررررررره ماتكلمني ..
سبب صغير وغبي .. انا اضفت قروب عندي ع المسن قروب بويز اند قيرلز وكنت اسولف معهم كلهم عااادي سوالف عاديه اضيع وقت بما ان وقت فراغي مرررره كثيييييييييير .. وهي عرفت من هنااا وصارت ماتكلمني من هناا !!
تدرون وش هو الشي اللي يقهر ؟؟
1 - امي ماتعطيني وجه وماتسولف معي كله مع اختي الكبيره وكله تهزأني على كل شي وانا اتحمل واتحمل
2-اخوي متخلف زي اختي مره معقد مع انه والله واقولها بصراحه راعي بنات ومغازل ودخان وشيشه وكل شي من هالانوااع بـ إختصار شكاااك .. وكلن يرىآ الناس بعين طبعه ..
مثلاً ياجماعه مرات اكون اتكلم بالجوال واضحك ومبسوطه يجي ينشب عندي وانا مرات اقوم من عنده اذا كان كلام خاص بيني وبين اللي اكلمها ومرات اجلس واكمل الهروج عادي .. واذا قفلت ياكلني بنظراته ويقول لي "مين كنتي تكلمين؟!" .. انا مرات اقول له مايخصك من القهر اللي فيني ومرات اقول له صديقتي او بنت عمي مين من كانت .. بس هو استغفر الله العظيم بس !
حتىآ مره كنت اتناقش مع ابوي بما ان انا الوحيده بالبيت شريحتي موبايلي .. واقول له عن الباقات وكذا .. جاء جلس معانا اخوي وكنت اقول لـ ابوي انو اذا انا كانت باقتي الموج الازرق والطرف الثاني برضو مثلي الباقه الموج الازرق اقدر اكلمها 28 دقيقه بـ عشره ريال بس .. انا بس قلت هالمعلومه من هنا اخوي دخل خشمه بالسالفه وقال من تكلمين 28 دقيقه ؟؟؟
بالله مو شي ينرررررفز !!!!!؟؟؟؟؟؟؟؟
3-اختي مثل ماقلت لكم غبيه ومتخلفه ومعقده من يومهاا اساساً حتى زمان لما كانت تسولف معي كنا نسولف سوالف غبيه وعاديه مثل مواقف او شي زي كذا , ابدن ماتتجرأ معي ونتناقش بجرآه ..

..

بعد انا الحين في صف اولىآ ثنوي .. البس عبااة راس .. ادري هالشي حلوو .. بس هالشي معصبني ومنرفزني .. تدرون ليش الشي هذا معصبني ؟؟
السبب / لان هالشي غصب عني !!!!!
انا من يوم اني في صف اولى متوسط عبااة رااس وتعب ..
تدرون حتى لما كنت في صف سادس ابتدائي ماقد شريت عباايه فيها تطريز وحركات مع اني كنت اعتبر طفله عمرها 12 سنه ......
انا حالياً مشكلتي بالعبايه ..
عندكم انا بمدرستي معي اربع بنات عم .. كلهم عبايات كتف وتطريز وكذا .. انا الوحيده من بينهم عباة راس والله امشي معهم تقل امهم بعبااتي .. والله كل ماشافوني بالعبااة هذي يقولون لي ليش ماتلبسين عبااة كتف وانا اصرف الموضوع مع ان انا ودي فيها والله ..
انا خواتي ثنتين .. كلهم من بدأو يلبسون عبايات الى ان وصلو صف ثالث ثنوي يلبسون عباة كتف وتطريز وكذا .. وهم بـ إرادتهم غيرو عباياتهم لـ عبايات راس ..
انا لما اقول لـ أمي ابي عباة كتف تهزاني وتتحلف وتتوعد اني مارح البسها !! طيب خواتي كان عادي وانا لا ! ليش التفرقه بيننااا !!
بس ابوي عنده عااادي ..
موقف مع اخوي /
مره وبعد ترجي وصياح لمدة شهر ونص عند امي وبعد اقناع من ابوي لهااا
شريت العبااة وفرحانه فيهاا واخيرن قدرت اشتريها
اخوي شافها
وقام ينافخ ويصارخ ويهزا ويقول لي "والله لااذبحك وانتي لابستها" ... !!!
وبعد "تبين يقولون اخت فلااان لابسه العبااة الفلانيه تبين تفضحيني "
كلن له بنفسه ... هو اساساً مفضووح انه داشر وش دخله فيني !!!؟؟؟؟
ومالبست العبااة ولا مره بسبب الحقير اخوي واعتراضاته ..
ابوي تعب من اخوي واعتراضاته وقال لي خلاص ماتلبسينها وخذاها ..

..

امي مو متفهمه ابدن .. وكل شي عندها صراخ وهواش بـ إختصار ومع احترامي لها بـ كونها امي .. هي تعتبر في هالزمن"متخلفه" ..
ابوي يالبى قلبه هو الوحيد اللي يفهمني ويعطييني وجه ويحاول قد مايقدر مايحرمني من شي بس امي الله يهديها تسيّطر ع الاوضاع بطريقه عجيبه ..

..

ياجماااااعه ابي حلوول لمشااكلي لاني والله ماعندي حد افضفض له واشكي له ...
انا الحين وبصرااحه والله صرت اكلم اولاد ع المسن بس مو حب ومدري وشو والله نتكلم ونسولف عادي ..
انا تجرات ووصلت لهالنقطه بسبب الضغط اللي احسه واخااف اوصل لمكالمات ع الجوال وبعدها الله يستر ...
تكفون سااعدوني ...
اانا ابي عباة كتف بس مو عارفه اقنع امي ...
اعترف اني حاقده على اختي بس تعبت وانا اتجاهلها وهي تتجاااهلني .. شي صعب والله , ابي حل تكفون !
اخووي كييييف اتعاامل معااه .. هو مايكلمني ولا اكلمه وان كلمني كله هواش ونفاخ ببعضنا .. عبيط بـ إختصار ومااحب اطلب منه شي ..

.. ادري كلامي مو مرتب .. لاني مو متعوده اشكي لأحد وكل شي اشيله بقلبي بدون مايطلع لـ مخلوق ..
أنتظر ردودكم .. :(​
في حفظ الرحمن ..
 
وعليكم السلام والرحمه

مرحبا اختي

والله مدري أرد عليك وش أقول لأني فتحت الموضوع وماحبيت أطلع من غير ماارد

أنتي ذكرتيني بنفسي كنت ابي اتمررد على كل شي وانتي بهالسن يمكن يكوون شيء عادي

حاولي لأتأخذين المواضيع بحساسيه لأنك توك صغيره بكره لما تكبرين بتقولين وربي إني كنت غبيه

مع إحترامي لك بس انا مريت بشيء من هالأشياء اللي مريتي فيه ولما اتذكرها اضحك على نفسي

اقول وربي كنت غبيه وضيعت وقتي بالزعل من فلان وبالهواش مع فلان وهذا غلط

وبالنسبه لأمك حاولي تتقربين منها بقدر ماتقدرين وشوي وشوي تتوضح الصوره وحاولي ماتسوين مشاكل

على أشياء ماتستاهل صدقيني بعدين بتندمين وتقولين ضيعت وقتي بالخرابييط

أدري اني ماحليت مشكلتك بس أتمنى تكوون وصلت الفكرررهـ

وآسفه على الإطالـــــــــه...
 
حبيبتي ,,, بكرا ان شاء الله بترجعين وتقرين كلامك وصدقيني راح تضحكين على همومك وتفكيرك ^_^
انا يوم كنت بعمرك كنت افكر زي تفكيرك واسخف , ياليتها ترجع هذيك الايام يوم كانت اكبر همومنا وش نلبس والا وش نشتري ^_^

اما اخوانك , انتي ماذكرتي كم اعمارهم ؟ اختك يمكن تمر بحاله انعزاليه وهالشي يصير لما يكون ماعد ودها تكلم احد حتى لو كان اقرب الاقربين امها وابوها او ,, اختها الوحيده ^_^
فانتي حاولي تثيري انتباهها , اشتري لها هديه , اشتري من البقاله حلويات وناديها يعني اي شيء ممكن يسوونه الاخوات .

اما اخوك لانه شاف وش ممكن يصير لو يترك لك الحبل على الغآرب فلا تلومينه , يمكن لو انا مكانه اسوي اكثر (لاتقولين عني متخلفه انا بعد ههه) .
اخوك صحيح ممكن يرفع ضغطك بعض الاحيان , لكن تعاملي معه بطريقه طنش تعش , لا تحاسبيه على كل كلمه .. خليه يتكلم ويهدد ويتوعد ....وانتي اللي براسك سويه !(هذي قاعده احفظيها في قلبك حتى بتعاملك مع زوجك بعدين)

امك وابوك هذولي عيونك المركبه , اي شيء يقولونه سمعا وطاعه , امك احيانا تكون مشغوله ومب فاضيه للسوالف او انك تحينها بوقت غلط دايم عشان كذا لاتلومينها اذا ماعطتك وجه , انتي تخيلي يجيك بزر ويقرق فوق راسك وش شعورك (مو قصدي انتي بزر بس احاول اشبه لك الفرق بالعمر بينكم).

الزبدة ياحبيبتي لا تضيعين احلى مرحله في عمرك بالمشاكل وانك تفكرين انك ناقصه عن البنات اللي حواليك باي شي والاهم لاتفكرين انك محرومه بالعكس عندك نعم كثيرة , لو انا منك امسك ورقه وقلم واكتب وش الاشياء اللي ربي منعم علي فيها واحمد ربي ...

الله يوفقك حبيبتي
 
غاليتي ((تعابير))
كم أثر فيني كلامك عن العبائة وعن الشباب الذين تتحدثين معهم على الماسنجر..
أعلم أن ما قد يصيبك قد يصيب أي فتاة في مثل سنك من تمرد على أهلها ولكن..
الخطأ في أسلوب أهلك واضح ولا أنكره وفي نفس الوقت لا أيدك أبداً وهذه الكلمات خارجة من قلب محب لك مشفقا عليك وليس العكس كما تظنين..
كل من حولك يحبونك ولكن تعاملهم هو الخطأ الذي لا تحبينه أنتي..
أنظري أي أختك وأي أخوك وكل ما ذكرتيه هو عبارة عن استنكار لما تفعليه ولكن بأساليب مختلفة لا أيدها أبداً
فأنتي بحاجة إلى قلب حنون يحتظنك ويلوي عليك وفهمك مدى خطورة الأمر ومدى غفلتك وحسن نيتك مع الأخرين
فالعالم الخارجي ليس كما تظنين وليس كما تعتقدين
أما بالنسبة لعبائة الكتف المطرزة والمزخرفه فهي حرام شرعاً ويجب أن تتغلبي على داعي الهوى وكل منا به داعي الهوى ولكن جلوسك مع نفسك وأفاهمهى أن ما يمنعك أهلك منه هو أما حرام او حلال فإن كان حرام فتركيه بنفسك دوم النظر إلى أسلوبهم ومعاملتهم لأنه يعود عليك بالنفع والفائدة وأستر لك وأحصن ومن ترك لله شيء عوضه الله بشيء خير منه وأعصي نفسك ولا تطيعيها في الحرام وقوي شخصيتك وأقرأ كثيراً وبيني لأهلي عكس ما يظنون من قوة شخصيتك ورضاءك بعبائتك وكل ما تريدن أرجعيه إلى الشرع فأنظر فيه ثم تخيري ما فيه نفع وصلاح لك دون النظر إلى أهلك وممن حولك فشخصيتك وحبك لذاتك تفرض الحكم عليك وليس هم من يفرضون..
أما بالنسبة لموضوع الشباب فلا تعليق وأنتي أعلم من به من ناحية حكمه الشرعي حتى لو كنتي بصفاء نيه وحسن ظن فالحرام بين والحلال بين وهذا ما ستندمين عليه فلا أريدك أن تكتبي لنا عن هذه المشكلة مستقبلاً لذا أتركيه من الأن وصاعدا فأنتي في غناه عنه...

غاليتي كل ممن حولك يتضح أنهم يحبونك ويخافون عليك ويمنعوك من الأشياء التي قد تضرك وتأذيك وتمس شرفك وسمعتك...

فأرجعي الأمر لضميرك وحبك لذاتك وخوفك عليها فأنتي أولى ان تحبي وتخافي على نفسك من غيرك..

الله يحفظ ويصونك لأني بالفعل قلبي يتفطر عليك وعلى حالك لأنك بحاجة إلينا فأرجوكي أكثير من القرأة في المنتدى الفاضل وابتعدي عن المجموعات المشبوهه والمنتديات المختلطه وأستمري معنا فأنتي في تغيير بإذن الله..
حفظ الله ورعاك ودام عليك الصحة والعافية
 
التعديل الأخير:
حبيبتي ¤تعابير¤انا حاسة فيك وخصوصآ انك في نفس عمري
أول شي لا تحسين بالحرمان لأن يمكن انتي اللي حارمة نفسك مواللي حوليك
أول شيئ سالفة القروب و أختك:اولآ هذا الشي غلط منك وحرام والمفروض اعتذرتي لاختك(لأن نيتها خايفة عليك وتبي تحسسك بكبر غلطتك)ووضحي لها انك ما راح ترجعين للغلط مرة ثانية لا تقولين مابي لأنك انتي الخسرانة.
نروح لأخوك انتي حاولي تتطنشينه (وحاولي تنصحينه عن المحرمات اللي يسويها وش يدريك يمكن يتأثر)
اما من ناحية العباية:انتي وش تبين بعباية كتف مطرزة؟!
أولآ حطي في بالك انه حرااام
وإذا أخواتك أول كانوا يلبسونها إلى ثالث ثانوي اكيد امك عانت وهم عانوا لين لبسوا عباية راس وامك ماتبي تكرر غلطتها(أمك تحبك وتخاف عليك بس انتي مو حاسة) وبعدين اذا بنات عمك قالوا ليه ماتلبسين عباه كتف قولي لهم لأنه حرااااااام اذا كانوا محترمات بيسكتون انتي اهم شيء اقتنعي ليه لابسة عباية راس؟!عشان امك ولا ربك وتقربي من ربك وحافظي ع صلواتك (وتذكري دائمآ ان اللي تلبس عباة كتف ضعيفة الشخصية وانصحك تسمعين محاضرة(ماأقوى شخصيتها)للشيخ عبد المحسن الأحمد بيأثر فيك وبتحمدين ربك انك ما تلبسين عباه كتف)
والشي الثاني الأولاد اللي مضيفتهم ع المسن:الحين والحين احذفيهم.لأنك قاعدة تجيبين لنفسك المشاكل اللي ولا شي من مشاكلك.
الأشياء اللي تسوينها بعد ما قريتي:
1‏)روحي حبي راس أمك وسوي أي شي يفرحها
2‏)روحي لأختك وسوي زي ما قلتلك
3‏)مري من عند أخوك وابتسمي له (هذا أقل شي يمكن تسوينه)وان قدرتي تقولين كيف حالك
4‏)ابحثي في قوقل عن المحاظرة اللي قلت لك ايها
5‏)احذفي الأولاد اللي مضيفتهم في المسن
6‏)سجلي في منتديات نسائية الدعوية وفي منتديات كثيرة ومنها هالمنتدى(وان بغيتي اسماء منتديات زي كذا ارسلي لي ع الخاص أحسن)
7‏)دوريلك عن صحبة صالحة (وهذي النقطة مهمه)ماتتخيلين بتحسين براحة(ولو تسجلين بدار تحفيظ أقسم لك انك بترتاحين كثير وبتتغير حياتك للأفضل

وأهم شي القناعة
وبعدين خبريني وش صار معك؟

أتمنى لك التوفيق والهداية
 
وعليكم السلام ورحمة الله وبركاته اختي الغالية
انا حاسة باللي تشوفينه وكيف الاحساس اللي عايشتنه في بيتكم

آسفة يا مجتمعنا , آسفة يا والدينا ، احنا كلنا ( تقريبا ) عايشين بنفس الطريقة
لا تقولين صديقاتي لا ، امبلا بس هم ما يبينون هالشي

انا ما اشوف تفكيرج سخيف أبدا ، بس صح لازم ما تاخذين الامور بحساسية
بالعكس تفكيرج يعبر عن حياتج والمشاعر اللي ف داخلج خاصة ان انتي في هالفترة بعدج صغيرة واحنا مراهقات!!

أول شي أمج لازم تحاولين تكلمينها بهدووووء
لما تكون بروحها كلميها وقوليلها انتي شو تبغين بهدوء وقوليلها انج تبغين تتناقشين معاها بهدوء و ما تبغين تصارخين
واول ما تبدا تعصب وتصارخ، بهدوء قوليلها لا يا يمه انا ما ابغي اضايقج او اخليج تعصبين
انا بس أبغي أقول اني أبي ( الشي الفلاني)

وعن موضوع العباة كلميها بالموضوع وقوليها انا اذا ابغي اقنع شخص أكلمه والا اجبره يعيش ها الشي؟
وبعدين قوليلها يمه انا صغيرة وبس ابغي البس واقرر واختار . . انا من حقي افكر واختار خليني البس هالعباة ( باقتناع )
واذا امي وابوي يوافقون المفروض اخوي يحترم قرارهم مثل ما انا او اختي نحترم ونسكت صح؟

بها الطريقة كلميها

أما عن موضوع أبوج ، انتي عندج حد يلمج ويسمعج استفيدي من هالشي وخبريه كيف يعلم اخوج كيف يحترم قرار والديه
وقوليله اذا انت واثق فيني شعليك من كلام فلان واخت فلان شو قالوا!!!؟؟

وأخوج حاولي تكلمينه بهدوء واذا ما صار
انصرفي عنه ولا تتكلمين معاه اكثر بيقولج كلام ما تحبينه او بيصدر قرارات ما راح تعجبج
((( أكره ما عندي الاخوان لما يتدخلون )))

موضوع أختج
يمكن ما تكلمج بجرأة لازم تقتنعين ان في اختلاف اراء , واسلوب يتغير من شخص لين شخص
انا بعد كنت احيانا ما اقدر اكلم اختي بجرأة هي أصغر ودايما اشوفها صغيرة بديت اسولف او ارسل لها اشيا على المسن واسولف بجرأة اكثر, واذا هي تستحي انا بكون جريئة معاها عقب فترة راح تتعود

أما عن موضوع المسن:
صح الموضوع مش حب ،
بس اذا انكشفتي هم ما بيعرفون غير ( هذا ولد )
وانتي فكري ف أهلج و ابوج اللي وثقوا فيج اكيد ما تبغين تخسرين هالشي
اذا انتي تبغين تستمتعين محد قالج لا اتعرفي على بنات جداد
ادخلي مواقع وتعرفي على بنات او صديقات صديقاتج..بس أولاد لا
صدقيني انتي في النهاية ما راح تستفيدين
ويمكن ما تحبين بس يمكن بعدين تحبين واحد منهم بدون ما تحسين مثل ما يصير مع الاغلب

حافظي على نفسج ، اثبتي لاخوج انه عكس ما يتوقعكم


وانا اقولج انا اعيش حياة تقريبا مثل حياتج..بس تعرفين عن شو ابحث؟
عن راحتي سعادتي..ما ابحثها عند الناس انا وجدتها في نفسي..
كل يوم اعيش هم ونكد .. بس ما اعطيهم فرصة أقتلهم واشوف الاشيا الحلوة
الحياة قصيرة وانا ابغي استانس فيها لاني والله استحق حياة حلوة
ااذا ما صارت الحياة حلوة انا بسويها حلوة

اختي االغالية نصيحة من اخت تحبج أنسي الحرمان
شوفي الاشيا الحلوة اللي عندج
صحتج واهلج و صديقاتج وايد اشيا حلوة لا تخسرينها وانتي غايصة في الهم وارف الدنيا


حطيهم ورا ظهرج وانبسطي وعيشي هاليومين وانتي مبتسمة

بالتوفي الغالية
أختج ‏Ms Uae
 
ما ني فاهمتك ايش تطلبين
انت عارفة ان اختك تشكك باخلاقك وعادي عندك
او انك فعلا تكلمين شباب
وبعدين امك ابوك اخوك
كانك ملخبطة السالفة وضحي ايش مشكلتك عشان نقدر نساعدك
 
البنات كلامهم صحيح كلنا مرينا بنفس حالتك
ماعندي شي ازيده اكثر من اللي قالوه
موفقه
 
يعني بالعقل اختك زعلانه عليك لاانها اكتشفت انك تتواصلين مع شباب لاتخسرين اخوك واختك وتطيحين من عينهم اكثر من كذا علشان عباه ولاشباب في المسن على فكره ترا البنت مثل المرايه اي غبار ياثر عليها الله يهديك
 
ياجبيبتي مومعقوله كل اهلك مخطين امك .وابوك.واختك.واخوك .((لا لازم فيه شي انتي موحاطه بالك يمكن الخطا منك ((اسمحي لي ))شوفي ((امك وابوك وش ماعملو واجبك تخدمين تحت رجليهم لانهم جنتك ونارك ))الله سبحانه قرن حقه بحقهم من عظم حقهم ..((كلمة متخلفه ))شلون قدرتي تكتبنها يااااااااعظم ذنبك
أم هاذي يابشر أم ((عقوق الوالدين من السبع الموبقات ))استغفري من ذنبك وتوبي استغفري وحبي رجل امك وابوك عشان ربي يوفقك ..
امابالنسبه لاختك انتي حاولي تكسبين رضاها برضو هاذي اختك الكبيره احترميها ...
امااخوك تجنبي المشاكل معه قد ماتقدرين ...
((بالنسبه لعباة الكتف ((اوجعت قلبي كلمتك امشي معهن كني من امهاتهن ((عباتك تاجك)) ((والتاج يوضع فوق الراس ))مو ع الكتف..عباتتك


حصن لك ((وعباة الكتف مايجوز تلبس امام الرجال تلفت النظر مايجوز..لايجوز يابنتي والله انك صغيره موعارفه مصلحت نفسك ..
((انتي مو محرومه مثل ماقلتي بعنوان الرساله ))
انتي بس تفكيرك يختلف عن تفكير اهلك ((هم انضج)) وانتي بعدك صغيره روحي من بعد ماتقرين ردي وحبي راس امك وتسامحي منها ((هي مادرت انتي وش كتبتي عنها بس الله يدري وشافك ))حسني اخلاقك مع اهلك صدقيني راح تغير كل حياتك بس حسني من طريقت تعاملك ..والله يسعدك ويوفقك يارب
 
تصدقين سجلت خروج ورجعت دخلت ,,,تذكرت انك كاتبه اكلم شباب ع المسن واخاق تطور واكلم ع الجوال ((تعالجين ضيقتك بالذنوب يعني هي كذا بااعتقادك الحل؟؟؟وماتدرين انها مصيبه وذنب ((لايغرك حلم الله وستره الله شديد العقاب ))اقطعي علاقتك بالمسن نهائي شرفك يابنتي راح يضيع حافضي ع اسم اهلك حرام يتدمر ((حرام تجازين اهلك بهالجزاء,,,))
لاتصيرين عبره لغيرك ..والله والله يتسلون بك الشباب والله مااحديرضى تكونين زوجه له ..انتبهي اقطعي العلاقات المحرمه ..توبي واستغفري انتي غرقانه بالذنوب ((الله يصلح حالك))
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل