يا مشعل اسمع !

          
يا مشعل اسمع و استمع عندي أبيات
          
          
وأعذرني يا مشعل تراها قليله
          


          
اليوم صايغها ومخصوصة بالذات
          
          
لمشعل أبو بسام راع الجميلة
          


          
مشعل وإذا قالوا لكم مشعل أيات
          
          
الجابري مشعل ولافي مثيله
          


          
يستاهل الأمداح لو هي كليمات
          
          
ويعذر قصوري كان ماعندي حيله
          


          
الصدق فيها ومن بغى مني اثبات
          
          
يبشر وعندي لكل قولٍ دليله
          


          
ولا هو بحاجة لتزكية أو شهادات
          
          
الناس تشهد له ومن كل قبيله
          


          
راعي فزوعٍ ماهو راعي عمولات
          
          
لله دره ما يجي في الرذيله
          


          
تبشر إذا جيته تبي منه فزعات
          
          
تبشر بسعْدك يجتهد بالوسيله
          


          
يستقبلك لاجيته بالابتسامات
          
          
أبشر وحاضر ديدنه واحليله
          


          
جيته مرار يجيلها تسع مرات
          
          
في كل مرة كنّها أولى أجيله
          


          
ولاهو بمستغرب من أهل الشهامات
          
          
أبوه عبدالله من أهل الجزيله
          


          
راع الفزوع الصعبة المستحيلات
          
          
ما كان يعرف فزعة ٍمستحيله
          


          
يفزع ولو كانت فزوعٍ خطيرات
          
          
يرمي بروحه كن عنده بديله
          


          
الصدق طبعه ولا يحب المتاهات
          
          
وإن قال قولٍ يوقف ويرتكيله
          


          
والوعد عنده محترم احترامات
          
          
كأنه حدٍ للسيوف الصقيله
          


          
ذباح حيلٍ مافكَر في الريالات
          
          
لو يستدين إن مالقي في مقيله
          


          
وإن قامت الهيّه ومعارك وصولات
          
          
ذراعك يابو مشعل عليهم طويله
          


          
يارب تغفرله جميع الخطيئات
          
          
وتنوّرله قبره في نهاره وليله
          


          
ويارب تجعل مسكنه وسط جنات
          
          
وجعله خوي للي سكن بالوسيله
          


          
أبوك باقي بيننا حي ما مات
          
          
أبوك نبراس العلوم الفضيله
          


          
ما مات أبوك لو إنه مابين الأموات
          
          
ما دام خلّفكم لنا بعد جيله
          


          
ايوالله هامه وكلكم بعده هامات
          
          
يحميكم الله من النفوس العليله
          


          
أقولها أمدح بعد ما شفت عاهات
          
          
تجهّز الأعذار لو هي هزيله
          


          
ما همّه حتى لو يكونوا قرابات
          
          
ولا همّه اسمه ولا تهمّه فشيله
          


          
متعوّد إنه يختلق اعتذارات
          
          
حتى غدا وجهه شبيهٍ لذيله
          


          
ما يدرى إن الجاه أخف المعونات
          
          
ولا يمنعه إلا اللي نفسه بخيله
          


          
أمدحك غصباً بعد شفت الفروقات
          
          
مابينك انته وبين ناسٍ عويله
          


          
والله ما نافقت ولا قلت كذبات
          
          
ولا قلت غير اللي بقلبي أشيله
          


          
واسأل من الخالق بديع السماوات
          
          
يحفظلك أولادك وعمرك يطيله
          


          
والختم صلوا على النبي الصلاوات
          
          
رسول ربي ومصطفاه وخليله